#1
ما أدري من اي يوم أبلش أكتب ..
بس أنا ماني محدده يوم معين لأنه راح نرجع كل فترات إلي عشت فيها و لها دخل في قضايا حياتي
- أبدي يومي عادي مثل أي بنت بالجامعة متأخرة على محاضرة الساعة 9 ، ما أحب هل وقت من المحاضرات بس ماكو غيرها .. أسبوع أداوم و أسبوع اسحب عليه .
- ما أحب الروتين بس كل يوم الصبح حياتي مثل ما أهيا ما تتغير فأقدر أسميها روتين يومي ...
- من الساعة 7 الصبح أمي نوره أتقعد فيني .. طبعا مو من أول مره أقوم فترجع أمي نوره أكثر من مره أتقعد فيني و جملتها المتكررة كل يوم
" ميار لا أتروح عليج المحاضرة هذي أخر مره راح اقعدج "
و تطلع من الدار معصبة و أتروح تبدل لأنها لازم أتكون في دوامها 9
الصبح بس تنزل تحت حق أمي منيرة و تقعد وياها .
صج أمي نوره قالت أخر مره أيي اقومج بس عقب 10 دقايق أترد غرفتي
يعني تقدرون أتقولون ما تنزل تحت حق أمي منيرة لما تتأكد إني قمت هل
مره صج .
كل يوم الصبح على هل موال ، أحلى الأوقات عندي الصبح لأنه اقدر اقعد مع أمي منيرة و أمي نوره بروحنا ولا أحد يأثر علينا أو يعكر مزاحي أنا بالأخص ، أقصد خالتي هدى .. لأنه ريل خالتي هدى دبلوماسي وكل شغله بره الكويت و نادر ما يرد الكويت الا بالمناسبات إلي أتناسب شغله طبعا ، و إهيا متقاعدة فيعني ما عندها شغله .
أمي منيرة كل يوم الصبح أتسوي لي الريوق إلي أنا أحبة لأنه هذي الوجبة الوحيده إلي اقعد وياهم فيها ، الغدا و العشا نادر ما أكون موجوده
لأن كل ما نتيمع تنتهي القعدة باختلاف وجهات نظر و طبعا على كل شي
أقولة يتم رفضه من خالتي هدى أو أتعقب على الموضوع بسخرية.
أمي منيرة الوحيدة إلي تقدر أتغير رأيي ما أقدر أرد لها طلب يعني لو قالت
لي تعشي معانا ما أقدر أقولها لا بالرغم أن أدري راح تنتهي هل قعده بزعل وايد ناس .
بخلي الأحداث تجر بعضها البعض ..
في هل يوم نزلت تحت المكان المعتاد حق الأكل مثل كل يوم أمي منيرة وأمي نورة كلوا قبلي لأني أتأخر ..
منيرة : عندنا عرس ولد يارتنا أم سعود عقب
باجر لازم كلنا انروح ما أتقصر أم سعود ويانا
نوره : لا يمه أنا عقب باجر مسافرة أمس
بالدوام بلغوني
مو أول مره أمي نوره تحدد سفرة حق عملها و إحنا ما ندري و مرات يصادف نفس اليوم أتقولنا عن هل سفرة ، يمكن أول كنت أهتم و أتضايق
بكون بروحي لأيام ، بس الحين ما قمت أتأثر و خبر سفرها عادي بالنسبة
لي ، بس هل مره كانت غير بأحداثها .. سفرت أمي نوره غيرت وايد أشياء
منيرة : ميار يمه ليش ما تاكلين ؟
منار : ماني مشتهية يمه
منيرة : ليش يمة فيج شي ؟
منار : لا بس ماني مشتهية
منيرة : أخذتي ابرتج ؟
منار : أي
نورة : شفتي يمة تأخذ الأبره ولا تاكل
وإطيح علينا أخر شي ..
منيرة : يمه ميار أنتي تدرين لازم تأكلين
ماراح تروحين الجامعة إذا ما كليتي
نورة : هذا الي اهيا تبية .. المهم انا رايحة
الشغل .. تأمرين على شي يمه ؟
منيرة : لا يمة ديري بالج ...
نورة : أكلي وروحي الجامعة وايد محاضرات طافتج
حوار يومي تكاد تختلف تفاصيله ولكن تشابه الأحداث في النهاية
أمي نورة أتروح شغلها و أمي منيرة تنصحني . الحياة جعلتني أكثر هدوءا
أسمع ولا أتكلم .. باقتناع أو من غير اقتناع
منيرة : راح أتردين على سوالفج القديمة ؟ و ما تاكلين ؟
ما صارلج أسبوع طالعه من المستشفى تبين أتردين لها ؟
ما أدري ليش كلام أمي منيرة لو شنو يكون في من مواعظ و حكم و نصايح
يخليني أبتسم ، أحب كلامها و أحب اقعد وياها ، يمكن إهيا الوحيدة تحي
فيني الأمل في الحياة ..
ميار : لا يمة باكل وبقعد وياج لأنه ما راح أروح المحاضرة
منيرة : ليش ماراح اتروحين ؟ وايد طافت عليج حصص
ميار : يمه شنو حصص .. محاضرات حصص أيام المدرسة
منيرة : جامعة أو مدرسة ليش ماراح أتروحين ؟
ميار : مو مهمة وايد محاضرة اليوم ..
ليست هناك تعليقات:
إرسال تعليق